Sunday, December 21, 2014

The Choice - Nicholas Sparks

ඔහු Travis Parker ය.  

North Carolina හි මුහුදු වෙරළක් අබියස මනස්කාන්ත නිවස්නයක වාසය කළ ඔහු වටා කෙළිලොල් යහළුවන් පිරිසක් ද විය. බෝට්ටු පදිමින්, පිහිනමින්, එළිමහන් barbecue සාද පවත්වමින් ඔහු ගතකළ ජීවිතය බොහෝ මිනිසුන් හුදෙක් නිවාඩුවක දී පමණක් ම ගතකළ එකක් විය. 

දිගු කාලීන පෙම්වතියක් සොයාගැනීම වනාහි ඔහුගේ මෙම නිදහස් ජීවිතයට බාධා කරන්නක් බව ඔහු තරයේ ම විශ්වාස කළේය. 

නමුත් ඒ Gabby Holland ඔහුගේ යාබද නිවසට පැමිණෙන තුරු පමණි. 

අසල්වැසියෙකු ලෙසින් ඈ හා මිතුරු වන්නට ඔහු දැරූ වැයම තුට්ටුවකට මායිම් නොකළ ඈ  කිසිවිටෙකත් ඔහු හා මිතුරු ලීලාවෙන් කතාබස් කලේ නැත. 

පරම සතුරෙකුට මෙන් තමන්ට සලකන ඇගෙන් එහි වාරුව කෙසේ හෝ ගනිමියි නොයෙක් වර සිතු ඔහු ඒ සඳහා නොකළ දෙයක් නම් නැත.  

නමුත් එකී ක්‍රියාදාමයන් අවසානයේදී සිදුවන්නේ වෙනකකි. 

ඈ  ඔහු හා පෙමින් බැඳෙයි. 

නමුත් ඈ  හට වෙනත් පෙම්වතෙකි. 

ඉඳින් කෙතරම් කාලයක් පුරාවට මේ නව යුවලට තම අදර කතාවේ සොඳුරු පිටු ගියෙන් සිත්තම් කරන්නට වරම් ලැබේවි ද???   

Saturday, November 29, 2014

The Day of the Jackal - Frederick Forsyth (වෘකයාගේ දවස - අභය හේවාවසම්)

පහළොස් වන දිගහැරුම...

රයිෆලයක් අතින් ගත්, රටක අනාගතය වෙනස් කල හැකි මිනිසෙක්...

ජනපතිවරයෙකු ඝාතනය කිරීමේ අතිශය රහස් කුමන්ත්‍රණයක්... 

තවත් මිනිත්තු කිහිපයකින් සිදුවන්නට නියමිත කුරිරු ඝාතනයක්... 

නමුත් එම ඝාතන තැත වැළක්වීමට සමතෙක් අහලකවත් නැත...

රනින් දිදුලන කෙස් කළඹක් වටකොට ගත් අතිශය තියුණු නෙත් සඟලක් හිමි ඔහුගේ සැබෑ නම අදටත් රහසකි. 
අපි ඔහුට  Jackal කියමු. 

තවකෙකු වෙනුවෙන් කුලියට තවත් එකෙකු මරාදැමීම ජීවිකාව කරගත් ඔහු ඉංග්‍රීසි ජාතිකයෙකි. 

වෘත්තීය කුලී ඝාතකයන් අතළොස්ස අතරේ අන් කිසිවෙකු හා අසම සමව ඉහළින්ම වැජඹෙන ඔහු ගැන වතගොත දත් ආරක්ෂක සංවිධානයක් යනු හුදෙක් සිහිනයක් ම පමණි. 

ඉඳින් ඔහුගේ කර්යශුරත්වය ගැන තවත් වර්ණනා කුමටද... 

කිසිදා නොවැරදුනු ඉලක්කයක් ඇති ඔහුගේ සුක්ෂම දෑතට මෙවර ලැබෙන්නේ දැඩි ආරක්ෂක රැකවල් මැද දිවි ගෙවනා මිනිසෙකු ඝාතනය කිරීමේ කොන්ත්‍රාත්තුවකි...



මිල : සිංහල පරිවර්තනය : රු. 300 සිට
         ඉංග්‍රීසි : රු.1200 යි.

Saturday, November 22, 2014

The Witness by Nora Roberts

දාහතර වන දිගහැරුම....

කුතුහලය අවුස්සන භයංකර අභිරහසක් හා සුන්දර ආදරයක් අතරට මැදිව දිවිගෙවනා ඇයට සැමදා සැඟව සිටිය නොහැකියි.

තම මවගේ දැඩි පාලනයට නතුව දිවි ගෙවූ එලිසබෙත්, ඈ නොමැති එක් දිනෙක රාත්‍රී සමාජ ශාලාවක් වෙතට පිය නඟයි. එහිදී ඈ ඇති පදමට රහ මෙරින් සප්පායම් වෙයි. මත් වී සිටිනා ඈ වෙත පැමිණෙන එක්තරා රුසියානුවෙක්   Lake Shore Drive නමින් හැඳින්වෙන පෙදෙසක ඇති නිවසක් තුළට ඈ කැඳවාගෙන යයි. එතැනින් පසු සිදුවන සිද්දි දාමයක් ඇගේ ජීවිතය සදහටම වෙනස් කිරීමට සමත් වෙයි.

දොළොස් වසරක් ගතවෙයි.

Ozarks හි කුඩා නගරයක් ආසන්නයෙහි  ජිවත්වන,  නමින් Abigail Lowery වන  තවත් එක් කාන්තාවක්  වෙත  කතෘතුමිය තම පන්හිඳ මෙහෙයවයි. නිවාස ආරක්ෂක පද්ධති සැලසුම් කරනා ඈ පරිගණක ක්‍රමලේඛ ශිල්පිනියක වෙයි. ස්වකීය ආරක්ෂාව සඳහා රුදුරු සුනඛයෙකු සහ ගිනි අවි ළඟ තබා ගන්නා ඈ මෙතරම් ආරක්ෂාවක් ඈ වෙත අවැසි වන්නේ මන්දැයි කිසිවෙකු හා නොපවසයි. 

වැඩි ආරක්ෂාවක් සහිතව, කිසිවෙකු හා වැඩි සම්බන්ධයකින් තොරව ඈ ගෙවනා රහස්‍ය ජීවිතය කුමටදැයි   ප්‍රාදේශීය පොලිස් ප්‍රධානි Brooks Gleason නොයෙක් වර සිතයි. කාගෙන් හෝ වියහැකි අන්තරාවක් ගැන බියෙන් ඈ කල් ගෙවන්නේ ද??? ලොවට හෙළිකළ යුතු අපරාධයක සුළ මුළ ඈ දන්නේ ද???  

මේ අතර ඔහු ඈ හට ආලය කිරීමට සැරසෙයි.

Tuesday, November 18, 2014

Fifty Shades of Grey - E. L. James ( අතිශයින්ම 18 + )

දහතුන් වන දිග හැරුම...

"රූ සපුවෙන් අග තැන්පත් හුරුබුහුටි ඇනාගේ දඟකාරකම් හමුවේ ඇයට ආලය කිරීමට ඔහු සැරසෙයි. 

නමුත් ඒ කොන්දේසි විරහිතව නොවේ... 

කොන්දේසි සහිතවය... "

            **********************

විසි එක් හැවිරිදි තරුණියක වූ ඇනා සරසවි අධ්‍යාපනය ලබන්නියක වුවාය...

ඇගේ හොඳම යෙහෙළිය කේට්, සති පතා පළවන සරසවි පුවත්පතට ලිපි ලිවිම සිදු කළාය.

දිනක් සියැටල් හි ජීවත් වන විසි හත් හැවිරිදි අතිශය දක්ෂ, තරුණ විවසායකයෙකු ගැන දැනගන්නා කේට් ඔහු ගැන ලිපියක් ලිවීමට සිතයි. 

නමින් Christian වූ ඔහුගේ සාර්ථකත්වයේ රහස ලොවට හෙළිකිරීමේ අරමුණින් කේට් ඔහු හා සම්මුඛ සාකච්චාවක් සඳහා දිනයක් ලබා ගනියි. 

නමුත් හදිසියේ ඇතිවන අසනීප තත්වයක් හේතුවෙන් යොදාගත් සම්මුඛ සාකච්චාව සිදුකිරීම සඳහා ඇනා පිටත් කර යැවීමට කේට් හට සිදුවෙයි.  
ඔහු දුටුවා පමණි, ඇනාගේ සිත ඔහු ගැන හටගත් පෙම් සිහින වලින් අතොරක් නැතිව පිරී යයි. 

ඉඳින් තමා ආ කාර්යය පසෙකලන ඈ ඔහුගේ පුද්ගලික ජීවිතය ගැන අනවශ්‍ය ප්‍රශ්න ගොන්නක් ඔහු වෙත මුදා හරියි. 

සම්මුඛ සාකච්චාව අවුල් ජාලයක් කරගන්නා ඈ එය අසාර්ථකව නිම කරයි. 

ඔහු යලිත් කිසි දිනෙක හමු නොවෙනා බව දන්නා නිසාම ඈ සියල්ල අමතක කොට ආපසු පැමිණෙයි.. 

පසුදිනෙක සාප්පු සන්කිර්නයකදී තමන් ඉදිරියට ඇවිද එන Christian දකිනා ඇනා වික්ශිප්ත වෙයි. 

රූ සපුවෙන් අග තැන්පත්  හුරුබුහුටි ඇනාගේ දඟකාරකම් හමුවේ ඇයට ආලය කිරීමට ඔහු සැරසෙයි. 

නමුත් ඒ කොන්දේසි විරහිතව නොවේ... කොන්දේසි සහිතවය... 

ඔහුගේ අස්වාභාවික කාමුක ආශාවන් ඉදිරියේ තැතිගැන්මකට ලක්වන ඇනා ඔහු හැර යාමට සැරසෙයි. 

නමුත් ඈ තුල ද කෙමෙන් ජනිතවන එවන්ම වූ අස්වාභාවික කාමුක ආශාවන් හමුවේ  ඔහු හැර දා යාමක්  ඈ කිසිදා  නොසිතයි.... නොපතයි...

Sunday, November 2, 2014

Nothing Lasts Forever - Sidney Sheldon


දොළොස් වන දිගහැරුම...

නමින් ඈ Paige  ය. හෘද හා උරස් ශල්‍ය වෛද්‍යවරියක( Senior resident in Cardio thorasic surgery) විම සඳහා වූ අවසන් පුහුණු කාලය ගත කල ඈ සැම සිත් ගත් සුන්දර තරුණියක වුවාය. අසරණ රෝගීන් කෙරෙහි වෙඩරු පිඩක් මෙන් සැනෙන් උණුවන හදවතක් දරා සිටි ඈ කිසි දිනෙක මුදල් පසු පස හඹා නොගියාය. මඩිය තර කරගැනීම නම්වූ පහත අරමුණ සපත කරගැනීමේ මන්ද මානසිකත්වයෙන් රෝගීන්ට ප්‍රතිකාර කිරීම ඈ සැමවිටම පිළිකුල් කළාය. 

ශ්‍රී ලාංකීය අප වෛද්‍යවරුන්ට දෙවි වරුන්ට මෙන් සැළකුවත් දියුණු යැයි කියාගන්නා අපරදිග වැසියන් එසේ නොවේ. ඔවුන්ට වෙදුන් යනු තවත් එක් වෘතිකයන් පිරිසක් පමණි. අප මෙන් විශේෂ ගරු කිරීමක් කරන්නේ නැත.


දිනක් Paige ප්‍රතිකාර කිරීමට යන හෘද රෝගියෙකු ඈට අතිශය අකාරුණික ලෙස ආමන්ත්‍රණය කරයි. මේ බැ*ලි ද මට බෙහෙත් දෙන්නේ???  


ඔහු වේදනාවෙන් පෙළෙන එක් දිනෙක ශල්‍යකර්මයක් සිදු කොට පපු කුහරය විවර කර බලනා ඈ දකින්නේ  අවසන් අදියරේ වූ පිළිකාවකින් ඔහුගේ හෘද වස්තුව දරුණු ලෙස හානි වී ඇති බවකි. පිළිකා පිළිඹඳ විශේෂඥ වෛද්‍යවරයාගේ අදහස අනුව ඔහුට ජීවත් වීමට ඉතිරි ව ඇත්තේ උපරිම වශයෙන් තවත් දෙසතියක කාලයකි.


Paige හට ඔහු කළ අකාරුණික ආමන්ත්‍රණය එදවසින් පසු ලයාන්විත හැඟුම්බර ආමන්ත්‍රණයක් බවට පෙරලෙයි. උහුලාගත නොහැකි තරම් වූ අතිශය වේදනාවෙන් පෙලෙනා ඔහු ඇගෙන් ඉල්ලන්නේ එකම එක අහිංසක ඉල්ලීමකි. 


බෙහෙතක් විද මා මරා දමන්න. මා කෙසේ මේ වේදනාව තවත් ඉවසා සිටින්නද...


එදින සැන්දෑ යාමයේදී ඈ ඔහුගේ ඉල්ලීම ඉටුකරයි.


සතියක ඇවෑමෙන් ඈ හට දැනගැනීමට ලැබෙන්නේ ඩොලර් මිලියනයක් පමණ වන ඔහුගේ මුළු බුදලයම ඈ හට පවරා ඇති බවකි. 


මේ බව දැනගන්නා ඔහුගේ පවුලේ අය , මුදල් ලබාගැනීම පිණිස ඈ ඔහු ඝාතනය කල බවට පැමිණිලි කරයි.


එය සත්‍යයක් නම් දඬුවම මරණයයි. ඔවුන්ගේ ඒකායන අරමුණ වන්නේ ද එයයි.


ඔහු පෙරදී ඈ හට කළ අකාරුණික ආමන්ත්‍රණය ගැන පමණක් දන්නා සියල්ලෝම සිතන්නේ ද නොවැරදීම ඈ වරදකරු වන බවයි.


මේ පළමු පිටු කිහිපයේදී දිගහැරෙනා සිද්දි දාමයයි. ඇගේ ඉරණම දැනගැන්මට කුහුලින් පෙළෙන පාඨක අප ඉදිරියේ ඉනික්බිතිව දිගහැරෙන්නේ වෙනස්ම සිද්ධි දාමයකි. 


Paige ගෙවූ සුන්දර ළමා කාලය, ඇගේ ප්‍රථම ප්‍රේමය, වෛද්‍යවරියක වී රෝහල වෙත පැමිණෙන ආකාරය, එහිදී ඈ මුණගැසෙනා යහළුවන් සහ ඔවුන්ගේ අතුරු කතා, වෛද්‍යවරුන් ගත කරනා ඔබටත් මටත් සිතාගත නොහැකි අතිශය කාර්යබහුල වෙහෙසකර දින චර්යාව.


නමුත් මේ අනිකුත් වෘත්තාන්ත සියල්ල අවසානයේදී Paige ගේ ඉරණම වෙත පාඨක අප යොමු කරයි. 

Sunday, October 26, 2014

ගැට කපන පුංචා - වෛද්‍ය චන්දන මෙන්ඩිස් ,Smith - Lion Garfield

එකොළොස් වන දිගහැරුම...

මිනිසුන් සියගණනින් ඔබ මොබ ඇවිදින ජරාජිර්ණවී ගිය විදී ඔබ කොතෙකුත් දැක ඇති.

මනු සතුන්ගෙන් මෙන්ම සතුන්ගෙන් ද ගහන එවන් අපුල විදී ස්වකීය වාසස්ථානය කරගත් මිනිසුන් ද ඔබ ඕනෑ තරම් දැක ඇති. 

ඔබේ දෑස අවදි කර බැලුවා නම් නාවර පෙරාගත් චූටි කොල්ලන් ද ඒ අතර සිටිනු ඔබේ නෙත ගැටෙන්නට ඇති. 

ඒ 18 වන ශත වර්ෂයයි. ස්ථානය ලන්ඩනයේ අඳුරු අහු මුළු ය.

දැලි රවුල් කෙටිය වත් හරි හැටි නොවැඩුණු වැරහල්ලකින් හෙළුව වසාගත් අපේ කතා නායක කොලු ගැටයා නමින් ස්මිත් පමණක්ම විය. 

ගැට කැපීම වූ කලී ඔහු ප්‍රගුණ කළ ශිල්පය විය. ඔහුගේත් පවුලේ අයගේත් කුසගින්න නිවාලූ ශිල්පය විය.

දිනක් ස්මිත් නාදුනන මිනිසෙකුගේ පසුම්බියක් සොරකම් කරයි. තත්පර කිහිපයක ඇවෑමෙන්  එම නාදුනන මිනිසා තවකෙකු අතින් ඝාතනයට ලක්වෙයි. 

නමුත් ඔවුන්ට අවැසි දෙය දැන් ඇත්තේ ස්මිත් සතුවය. 

මිනිසෙකුව පරලොව යවන්නට තරම් හැකියාවක් තිබු පසුම්බිය සොයා දෙදෙනෙක් ස්මිත් පසු පස ඉව අල්ලයි. 

උපක්‍රමශීලිව ඔවුන් මඟහැර යාමට ස්මිත් සමත් වෙයි. 

මිල්ලේ සොයා පසුම්බිය ඇර බලන ස්මිත් එහි වූ ලියවිල්ලක් සොයාගනියි. 

නමුදු ලියන්නට හෝ කියවන්නට නොදත් ස්මිත් හට එය තවත් එක් ලියවිල්ලක් පමණක් ම විය. 

එහෙත් මෙහි වූ අභිරහස් පණිවුඩය කවදා හෝ දැන ගැනීමට සිතන ස්මිත් එය සුරැකිව තබා ගනී. 

ලන්ඩනයේ අඳුරු මං මාවත් හා ධනපතීන් වෙසෙනා පෙදෙස් ඔස්සේ ඔබ මොබ යන ස්මිත් හට දිනක් ඇස් නොපෙනෙන ධනවත් මිනිසෙක් මුණ ගැසෙයි. 

ස්මිත් තම නිවසට කැඳවාගෙන යන ඔහු ස්මිත්ට අකුරු කියාදෙයි. 

නමුත් තවමත් ඝාතකයක් ස්මිත් පසුපස... 

ධෛර්යය හා අධිෂ්ඨානය එක ලෙස කැටි කොට ගත් පුංචි ස්මිත් දැන ගන්නා ලියවිල්ලෙහි වූ රහස කුමක්ද???

Sunday, October 19, 2014

Message in a Bottle - Nicholas Sparks

දසවන දිගහැරුම...

මුහුදට විසිකරනා කුඩා බෝතලයකට ඉනික්බිතිව අත්වන ඉරණම කුමක් විය හැකිද ? 

සප්ත මහා සාගරය තරණය කරනා එය මිහිමඬලේ එහා කොන සිටින්නෙකුගේ වුව නෙත ගැටිය හැක. 


පුවත්පත් තීරු ලිපි සම්පාදිකාවක ලෙස ගෙවනා වෙහෙසකර දිවියට මද විරාමයක් තැබීමේ අරමුණෙන් වෙරළ තීරයක් අභිමුවට පැමිණෙන වැන්දඹුවක වූ Theresa Osborne  හට දිනක් මුහුදු වෙරළෙහි අද්දරට වන්නට තිබී එවන් කුඩා බෝතලයක් හමුවෙයි.


එහි වූ රෝල් කරන ලද ලිපියක් දකිනා ඈ හට එය කියැවීමට සිත්වෙයි.


"සදාදරණිය කැතරින්,හැමදාම වාගේ නුබ නැති පාළුව අදත් මගේ සිත තදින් ම වෙළාගෙන...ඒත් අද මහ කටුක දවසක්...දුක් අදෝනාවක් වැනි මහා මුසල ස්වරයකින් කෑගහන මේ මුහුදු රළ අපේ ඒ ආදර කතාව මට ආයෙමත් කොඳුරා කියන්නට වගෙයි හදන්නේ..."


මෙසේ සොවින් බරව වදන් ගලපනා ඔහු එක් නිමේෂයකින්ම ඒ දුක් ගීතය කුඩා බෝතලයක සිර කොට මහා සාගරයෙහි පාකර යවනුයේ තමන්  හැරදා ගිය ඒ සොඳුරිය කැතරින් කෙරෙහි වූ කිසිදා නොමියෙනා ආලය පැවසීමට ඒ හැර වෙනත් කිසිදු ක්‍රමයක් ඔහු නොදත් නිසාවෙනි...


සිය  ස්වාමි පුරුෂයා කෙරෙහි  වූ අචල විශ්වාසය සිඳී බිඳී ගිය දා පටන් ආදරය නමින් හැදින්වෙන ඒ සොදුරු පහස අහිමිව කල් ගෙවූ  Theresa  උක්ත ලිපිය කියවීමත්  සමගින් ඇගේ සිත වේලාගන්නා ප්‍රශ්නාර්ථයෙන් කැළඹීමට පත් වෙයි...                       

ඔහු කවුරුන් ද??කොහේ සිටින්නෙක් ද ?? 

මේ අභිරහස අභියෝගයක් බවට පත් කරගන්නා ඈ ස්වකීය සිතුවිලි ධාරාවන් පවසනා මං සළකුණු  ඔස්සේ කිසිදිනෙක දැක නැති 'ඔහු' සොයා යාමට  තීරණය කරයි...

උන්ගේ හදවත් පෙර භවයක පටන් එකිනෙක බැඳී තිබුනා සේය...


එක්තරා දිනෙක හිරු එළියෙන් ඔපවත් වූ කුඩා වෙරළබඩ නගරයකට පැමිණෙන ඈ හට අහඹු ලෙස ඔහු හමුවෙයි...


ඔහුගේ අතීත මතක සටහන් සහ අසීමිත ලෙස ශක්තිමත් හෝ ඛේදජනක ලෙසින්  බිඳී යා හැකි හෝ සුන්දර ප්‍රේම කතාවක මතක පිටු අතරේ අතරමං වීමට, එහිම කොටස් කරුවන් වීමට පාඨකයන් වන අපට ඉනික්බිතිව  සිදුවෙයි.


Sunday, October 12, 2014

One Night @ the Call Center - Chetan Bhagat හලෝ හලෝ - දිලීප ජයකොඩි

නව වන දිග හැරුම...

හේමන්ත ඍතුවේ එක්තරා දිනෙක රාත්‍රී දුම්රියක ගමනේ යෙදෙන ලේඛකයෙක් හට යව්වනියක මුණ ගැසෙයි. 

ඒකාකාරී වුත් අතිශය වෙහෙසකර වුත් දුම්රිය ගමෙනේ ගමන් විඩාව දුරු කරගැනීම සඳහා ඔහු ඈ හා දොඩමලු වෙයි. 

මා ඔබට කතාවක් කියන්න ද???

ඈ අසයි...                    හැබැයි...

මගේ කතාව ඔබගේ මීළඟ කෘතිය විය යුතුය.... ඈ  කොන්දේසියක් පනවයි. 

ඒ අසා ඔහු වික්ෂිප්ත වෙයි... එනමුදු ඇගේ කතාව ඇසීමට ඔහු සිත්ගනී. 

තමා දුරකතන ඇමතුම් හුවමාරු මධ්‍යස්ථානයක සේවය කරන්නියක බව ඈ පවසයි. 

කතාව අප ලද   පුදුමාකාර ඇමතුමක් ගැන...  

මා කියනා මේ දවසේ  අප හය දෙනෙක් එහි සිටියා...

ඔබ විශ්වාස කරනවාද , එදා රෑ දෙවියන් අප ඇමතුවා...

දෙවියන් හමුවේ සයදෙනා කරන්නට යෙදෙන  පාපොච්චරණයන් පෙළක් ඉනික්බිතිව දිගහැරෙයි...








Sunday, October 5, 2014

ආදරණිය වික්ටෝරියා - මොහාන් රාජ් මඩවල

අටවන දිගහැරුම...

ඇති තරම් කාසි අතට ලැබුනත් ඉන් සැහීමකට පත්වන්නන් සිටින්නේ ඉතා කලාතුරකිනි.

ඔබ ඔබේ මුළු ජීවිතයම  කාසි කරගත් කල ඔබේන් ජීවිතය බලාපොරොත්තු වන්නන් හට යන කල දසාව කුමක්ද???

උන්, උන්ට ඕනෑ හැටියකට ජීවන ඉනිමග නගිනු ඇත.

උන්ගේ අවසානය  සුඛන්තයක් සේම දුඛන්තයක් ද විය හැක.

කලාතුරකින් දවසක හවසට රා විඩක් බොන්නට පුරුදුව සිටි උඩරටීයා කිසිදිනෙක සිහි විකල් වනතුරු රහ මෙරින්  සප්පායම් වු අයෙක් නොවේ.

නමුත් ඒ තැබෑරුම නම් සංකල්පය මේ සිරිලක් දිව් තලයට ආගමනය වූ දා දක්වා පමණි.

ඒ මේ ධර්මද්වීපයේ හා හා පුරා කියා තැබෑරුම් ආරම්භ කල කාල වකවානුවයි..

අදේට කුඹුරු වැඩ කල දුප්පත් ගොවියෙකු වූ දාවිත් අප්පු ඉතා සෙනෙහෙබර පියෙකු විය;ආදරණිය සැමියෙකු විය.නමුත් ඒ ඔහු මඩු විතෙහි වූ අපුල රසය තම දෙතොලින් චුම්බනය කළ අඳුරු දවස තෙක් පමණි.  එතැන් පටන් ඔහු හැන්දෑ යාමයේ දී නිවසට ගොඩ බසිනා යක්ෂයෙකු පමණක් ම විය.

දාවිත් පුත් අන්දිරිස් මේ සියල්ල ඉවසාගත නොහි තම ගෙදරට ආයුබෝවන් කියා රැකියාවක් සොයා යයි.මත් වතුර නම් වූ අදුරු රාක්ෂයාගේ අදුරු සෙවණැලි අතරින් ජීවිතය සෙවූ අන්දිරිස් කිසි කලෙක ඒ රාක්ෂයා තම ගෙපැලට නොවද්දා ගන්නා බවට ඉටා ගනියි.

දිනක් ඔහුට අරක්කු පිප්ප සැදීමෙහි නිපුන් වඩුවෙකු හමුවෙයි.ඔහු ඇසුරෙහි  ශිල්ප කරනා අන්දිරිස් කලක් ඇවෑමෙන් වඩු කර්මාන්තයේ පරතෙරටම යයි.. කාර්යක්ෂම වූ අන්දිරිස් වෙනකෙනේකුන් හා අසමසමව වඩු කර්මාන්තයේ නියැළෙයි.ඔහු වයික්කියටම සිටිනා දක්ෂම  වඩුවා වෙයි.රටට සිටින ප්‍රසිද්ධ වඩුවෙක් වෙයි. 

මෙසේ ලද මුදලින් ඔහුගේ සාක්කු පිරි ඉතිරී යද්දී ලද දෙයින් සතුටු නොවීම නම් සංකල්පය ඔහුව ආක්‍රමණය කරයි.

අරක්කු පීප්ප සෑදීමෙන් නොනවතින ඔහු  ඔහු අරක්කු නිෂ්පාදනයට ද අත තබයි. ටික කලකින්ම ඔහු රටම දන්නා අරක්කු නිෂ්පාදකයෙකු වෙයි.ඔහු වෙත ඇණවුම් ගලාගෙන එයි.දිනෙන් දින ඔහු දියුණුවේ හිනි පෙත්තටම යයි.

නමුත් ඔහුට ස්වකීය පවුල් ජීවිතය හරි හැටි කළමනාකරණය කරගත නොහැකි වෙයි.

මේ ආදරණිය වික්ටෝරියාව ඔබට පවසන කතාන්දරයයි. 

පානදුරා වාදය ගැන කතාව,
වික්ටෝරියා ගැන කතාව,
අරක්කු රේන්ද කරුවන් ගැන කතාව,
අන්දිරිස්ගේ ලිංගික ජීවිතය ගැන කතාව,
ධනපති පන්තිය ආක්‍රමණය කල ඉංග්‍රීසි සිරිත් විරිත් ගැන කතාව 
                වැනි අතුරු කතා ගොන්නක් මේ කතාන්දරය කියවන ඔබට මුණ ගැසේවි.

මා ඔබට දැන් අප මහා බුදුරජාණන් වහන්සේ  පැවසු වෙනත් කතාවක්(බුද්ධ දේශණයක්) කියන්නම්...

" ඔබ පංච සීලය සුරකිනා උපාසකයෙකු වශයෙන් කිසිදිනෙක මත් ද්‍රව්‍ය භාවිත නොකරන්න.එසේම මත් ද්‍රව්‍ය වෙළඳාමෙහි ද නොදෙන්න."  

"අසීමිත ආශාව වූ කලී පිරිහීමේ ලක්ෂණයකි."


Sunday, September 28, 2014

තුන් යහළු වික්‍රමය - කුලසේන ෆොන්සේකා...

හත්වන දිගහැරුම...

පෑනේ මිතුරන් තිදෙනෙකු වූ සුනිල්,රුවන් සහ අජිත් උසස් පෙළ විභාග කඩඉම හමාර කිරීමෙන් අනතුරුව මහනුවර රුවන්ගේ නිවස්නයේ දී යලිත් මුණ ගැසෙති...

පසු දිනෙක ඔවුන් අසල පිහිටි සුන්දර දිය ඇල්ලක මිහිදුම් සළු අතරේ කිමිදීමට යති...

එහි වූ කව්රුන් හෝ විසි කර තිබු පුවත් පත් කොටසක් නිකමට මෙන් කියවන ඔවුන්,නිදන් හොරුන් කණ්ඩායමක් අසල ගමක සිදු කරන ලද පුපුරවා හැරීමක් පිලිබඳ පුවතක් දකියි...

පසු දිනම මේ තිදෙනා ඒ ඉසව්ව සොයා යයි...

ඉනික්බිතිව තිදෙනාට සිදුවන්නේ කිසි ලෙසකින් වත් අපේක්ෂා නොකළ අත්භූත සිදුවීම් දාමයකට මුහුණ දීමටය...

ඕලන්ද යුගයේ ඉපැරණි කාසි,ත්‍රාසජනක ලුහුබැඳීම්,සිරගත වීම්,තුන් කුළුදුල් බිළිඳෙකු සහ දරුණු නිදන් හොරුන් අතරට මැදිවන වන මේ තුන් යහළුවන්ගේ කතාව නිසැක වශයෙන්ම ඔබේ ළමා කාලය ඉතා සුන්දර එකක් කරන්නට ඇති...

Saturday, September 20, 2014

Five Point Someone - Chetan Bhagat

සයවන දිග හැරුම...

ඔබ 3 Idiots හින්දි සිනමා සිත්තම නරඹා ඇති.එහෙත් ඒ සඳහා පාදක වූ ඒ අපුර්වතම අකුරු ඇමිණුම ඔබ කෙදිනක වත් කියවා නැතුවා වන්නට පුළුවන්. ඉදින් මේ ඒ ගැනයි.

ඒ ඉන්දියානු තාක්ෂණික විද්‍යයතනයයි.( Indian Institute of Technology IIT ).

දිනෙන් දින වෙනස් වන තාක්ෂණික ලෝකයේ ජය කෙහෙළි නැංවීමේ සොදුරු සිහිනය සැබෑ කරගැනීමේ අභිප්‍රායෙන්  Hari, Alok සහ Ryan   ඒ වෙත පැමිණෙයි. 

නමුත් ඒ සුන්දර සිහිනය වැඩි කලක් යාමට මත්තෙන් උන්ගේ ඇස් ඉදිරිපිටදී ම වියැකී යයි. 

උන් මුහුණ දුන් පළමු විභාගයේ දී ම අවම ලකුණු ලබා  දුර්වලතමයන් ලෙසින් IIT ජීවිතය ආරම්භ කිරීමට උන් හට  සිදුවෙයි. 

ඉඳින් රචකයා අප හට පවසන්නට යන්නේ ආයතනය තුල නිවැරදිව හැසිරී උන් වැටුණු වලෙන් ගොඩ ඒමේ මාර්ගය ගැනද??  නැත...ඔහු කියන්නට හදන්නේ ඔබ දුර දිග නොබලා කටුයුතු කරන්නෙක් නම් ඔබට් සිදුවිය හැකි අකරතැබ්බයන් ගැනයි.

එතැන් පටන් ඒකාකාරී නීරස ඉන්දීය අධ්‍යාපන සංස්කෘතිය තුල ගොඩනැගෙන උන්ගේ   කතාව Hari අපහට පවසයි.. 

දැඩි මතධාරී ගුරුවරුන්,කිසිදා නිම නොවෙන විභාග,අසීරු විෂය නිර්දේශ අතර අතරමන් වන උන්ගේ සිත් නිබඳවම ආදරය මිත්‍රත්වය වැනි එදිනෙදා දිවියේ රසමුසු අහුමුලු ද සොයා යයි.. 

ඒකාකාරී වූ දෛනික ජිවිතයට මද අස්වැසිල්ලක් ලැබීම ට උන් කරනා විගඩම්, නාඩගම් සහ පුරසාරම්කම් වල ප්‍රතිඵල දෙගුණ තෙගුණ වී උන් පසුපස හඹා එන සැටි කෙතරම් අපුර්ව ද ...

මේ අතර Hari විද්‍යයතනයේ මහාචාර්යවරයෙකුගේ දියණියක හා පෙමින් බැඳෙයි.

නමුත් උන් තවමත් දුර්වලතමයන් අතර...

IIT විදුපියස හැරදා යාමට උන්ට සිදුවේවි ද??

නොඑසේ නම් විශිෂ්ටයින් ලෙසින් IIT ජීවිතය ජයගැනීමට උන්ට හැකිවේවි ද???
රැකියා වෙළඳපොළ තුල සිටිනා අධික ඉල්ලුමැති තරු බවට පත්වීමට උන්ට හැකි වේවි ද ???




Sunday, September 14, 2014

Jamaica Inn - Daphne du Maurier (යකාගේ නවාතැන - Dr.චන්දන මෙන්ඩිස්...)

පස්වන දිග හැරුම...


හෙල්ෆොර්ඩ් හි ගම්බද ගොවිපොලක ඇති දැඩි වූ විසි හැවිරිදි Mary Yellan හට ස්වකීය මවගේ අකල් මරණයෙන් පසු කොන්වෝල් හි පිහිටා ඇති සිය නැන්දණිය ජීවත් වන Jamaica Inn තානායම වෙත යාමට සිදුවෙයි.
එහි සිට ගව් ගණනක් දුරට මනුෂ්‍ය වාසයෙන් තොර වූ තානායම වෙතට ඈ කැඳවාගෙන යන කරත්ත කරුවා එහි නොයන ලෙස ඈ හට බැගපත් වෙයි.
සැර පරුෂ දාමරිකයෙකු වන ඇගේ මාමණ්ඩිය විසින් පාලනය කරනු ලබන මෙම නවාතන් පොලෙහි නැන්දනිය ගත කරනා ඉතා අසරණ ජිවිතය දැක Mary කම්පනයට පත්වෙයි.
මේ අතර Jamaica Inn හි වූ අසාමාන්‍ය බවක් දක්නා මේරි කැළඹීමට පත්වෙයි.
නවාතැන් පොලක් වුවද එහි කිසිදු අමුත්තෙකු සිටියේ නැත.එපමණක් නොව එය කිසි දිනෙක අමුත්තන් සඳහා විවරව තැබී ද නැත. හතර වටින්ම තෙරක් නොපෙනෙනා වගුරු බිමකින් වටවූ Jamaica Inn තුලට වී සිය මාමණ්ඩිය සහ පිරිවර ගත කරනා රහස්‍ය ජීවිතය කුමක් සඳහා ද ??? Mary මෙහි වු අභිරහස සොයා යාමට තීරණය කරයි.
මේ අතර මාමා සහ ඔහුගේ සහචරයන් විසින් සිදු කරනා දාමරික ක්‍රියා අතරට මැදිවන Mary එහි සිටිනා තවත් එක් දාමරියෙකු හා පෙමින් බැඳෙයි.

Wednesday, September 10, 2014

The Whiff of Money - James Hadley Chase

සිව්වන දිග හැරුම… 


එක්තරා අඳුරු රාත්‍රියක හිටපු CIA රහස් පරීක්ෂකයෙකු වන Mark Girland සොයා ප්‍රංශයේ පැරිස් නුවර CIA ප්‍රධානීතෙම පැමිණෙයි. ඔබත් මමත් නොදන්නා එක්තරා අභිරහස් තරුණියක රංගනයේ යෙදෙන නිල් වීඩියෝවක් සහ එම තරුණිය සොයාගැනීම ඔහු Girland හට බාර කරයි..
සුරූපී ඈ කවරෙක් ද?

අනපේක්ෂිත මොහොතක මේ තරුණිය කවරෙක් ද යන වග ඔහු දැන ගනියි.Gilly නම් වන ඈ ඇමෙරිකානු ජනපති අපේක්ෂක දියණියයි.
නිල් වීඩියෝවක රඟපෑමට ඈ හට සිදු වුයේ කුමක් නිසා ද ??
සිය ජිවිතයේ මුල් යුගයේදී දෙමාපිය ආදරය සහ සෙනෙහස සිතැඟි පරිදි නොලබන නිසාවෙන්ම ඔවුන් හා තදබල් ලෙස වෛර බැඳගන්නා ඈ හට එහි වාරුව කෙසේ හෝ ගැනීමට අවශ්‍ය වෙයි.එබැවින් උක්ත නිල් වීඩියෝව ප්‍රසිද්ධ කරන බවට තර්ජනය කරමින් සිය පියා ජනපති ධුරයට තේරී පත්වීම වැලක්වීමට ඈ මාන බලයි..
මේ අතර පැරිසිය පුරා උක්ත නිල් වීඩියෝව හා ඈ සොයා යන Girland හට නිල චිත්‍රපට කර්මාන්තයේ නියැලෙන්නෙකු ඔවුන් පිළිබඳව හෝඩුවාවක් ලබාදෙයි..
මේ අතර එම වීඩියෝව පිළිබද ව දැනගන්නා සෝවියට් රුසියාව ද වීඩියෝව සොයා යාමට ඔත්තුකරුවෙකු ඒවා ඇමෙරිකාව අරාජිත කිරීමට මාන බලයි.මේ අතර තවත් තුන්වැන්නෙකු Gilly හා Girland මරා දමා වීඩියෝව විනාශකිරීමේ රහස් මෙහෙයුමක් අරඹයි…
Girland හා Gilly ගේ ඉරණම කෙසේ විසදේවි ද??

Friday, September 5, 2014

A Walk to Remember - Nicholas Sparks

තෙවන දිග හැරුම




නිල් වන්ව නෙත රඳනා lilac මලෙහි වූ ඒ අපුර්වතම සුගන්ධය , සෑම වසරක ම අප්‍රියෙල් මාසයේදී ,හමනා මුහුදු සුළං ප්‍රවාහයට මුසුවී දසත හමායන්නට වූ කළ ඔහුගේ සිත තමන් පාසල තුල ගෙවූ ඒ අවසන් වසරේ සදාදරණීය මතක සටහන් සොයා යයි. ඒ 1958 වර්ෂයයි.ඔහු ඒ වන විටත් යව්වනියන් කිහිප දෙනෙකු යහළුවන් සේ ඇසුරු කර තිබුණු අතර ඉන් එකියකට ඔහු සැබෑවටම ආදරය කල බවට ඔහුගේ සිත දිවුරයි..

පාසලේදී ඔහු මුණ ගැසෙන ගැහැණු ළමුන් අතුරින් අයෙක් කටකාරය.අයෙක් දගකාරය.නමුත් මේ සියල්ලන් අතරේ නිහඩ ගුප්ත යව්වනියකද වුවාය.


ඈ නමින් Jamie ය .Jamie නගරයේ පුජක තුමාගේ දියණිය වුවාය. . නගරයේ සිටිනා සියලුම යව්වනියන් මෙලොවින් තුරන් වී ඈ පමණක් ඉතිරි වුවත් ඔහු ඈ හා පෙමින් නොබැඳෙන බව ඔහු හොඳාකාරවම දනියි . ..ස්වකීය පොත් මිටිය සමඟ බයිබලයක් ද ලැමට තුරුළු කරගත් ඈ සම වයස් මිතුරු මිතුරියන්ගෙන් වෙන්වූ හුදෙකලා දිවියක් ගතකලාය. අනාථ වූ සතුනට ඇප උපස්ථාන කිරීම ප්‍රිය කළ ඈ තම වැන්දඹු පියා සමග වාසය කළාය . යෞවනයෙකු කිසි දිනෙක ඈ හා ඇසුර පතා නොතිබිණි.ඔහු වුවද එසේම විය..


අනපේක්ෂිත ලෙස පාසල් වසර අවසාන නර්තන අංගය(Home Coming Dance ) සදහා ස්වකීය සහයකයා ලෙස අකමැත්තෙන් මුත් ඈ කැඳවාගෙන යාමට ඔහුට සිදුවෙයි.පැයෙන් පැය ගතවී දිනයේ අවසන් හෝරා කිහිපය ලගාවන විට ඔහුගේ සිත ඈ හට ආදරය කිරීමට පටන් ගෙන තිබිණි...

ඇගෙන් ලද තෙරක් නොපෙනෙන ආදරය හමුවේ ඔහු ගෙවූ සැහැල්ලු විනෝද කාමී ජීවිතිය මහාපරිමානයේ වෙනස් කමකට බඳුන් වෙයි. ආදරය යන වදනෙහි සැබෑ අරුත ඈ ඔහුට කියා දෙයි.ඈ හා ඇසුරෙහි තෘප්තිමත් වෙන ඔහු ඈ අහිමි ජිවිතයක් නොපතයි. පැහැබර අනාගතයක සුබ සිහින අතරේ අතරමන් වන ඔහු , ඈ පවසන අනපේක්ෂිත හෙළි කිරීමෙන් කම්පනයට පත් වෙයි...

Monday, September 1, 2014

Veronika Decides to Die-Paulo Coelho

 දෙවන දිගහැරුම...


තෘප්තිමත් රැකියාවක්,ආකර්ෂණිය පෙම්වතුන්,ආදරණීයයන්ගෙන් පිරුණු නිවස්නයක්,මන බඳිනා රූසපුවක් යනාදී සියලු සිතූ පැතූ සම්පත් වලීන් අනුන ජීවිතයක් ගතකළ විසි හතර හැවිරිදි වෙරෝනිකා උක්ත කිසිම දෙයකින් සතුටු වන බවක් පෙනෙන්නට නොතිබිණි.ඉදින් ඈ මරණය කරා පිය නැඟීමට තීරණය කොට යලි කිසි දිනෙක අවදි නොවීමේ අරමුණෙන් වසර 1997 නොවැම්බර් මස 11 වන දින හිරු නැගෙන කනිසමේදී නිදි පෙති අහුරක් ගිල දැමුවාය .

මරණයේ සේයාවන් අතරින් පසු දිනෙක අවදිවන වෙරෝනිකා, තමන් මානසික රෝහල් ඇඳක් මත සිටිනු දැක වික්ෂිප්ත වුවාය.


 බලාපොරොත්තු අතරින් නැවතත් ජිවයේ පහස ලබන වෙරෝනිකා හට එහිදී දැනගන්නට ලැබෙන්නේ මරණය කරා වැටී ඇති ගමන් මාර්ගයේ ඈ අඩක් පමණක් පිය නගා ඇති බවකි. 

ඈ වෙත ක්ෂණික මරණයක් උරුම කිරීමට අසමත් වුවත්,නිදි පෙති අධි මාත්‍රාව ඇගේ සියුමැලි හදවතට දරුණු ලෙස හානි සිදුකොට ජිවත් වීම සඳහා වෙරෝනිකා හට එක් දිනක් පමණක් ඉතිරි කොට තිබිණි.

මානසික රෝහල් භුමිය තුල හමුවන මිනිසුන්ගෙන් ඈ ජිවිතයේ ජීවය පිලිබඳව වටහාගනියි..


නමුත් ඈ මරණය කරා පිය නගමින් සිටියි... 


ඇගේ ජීවිතය මරණයෙන් කෙළවර වේවිද???

Saturday, August 30, 2014

Dan Brown-Angels & Demons

පොතක මහිම...පළමුවන දිගහැරුම... 

Dan Brown-Angels & Demons...



ස්වීඩන පර්යේෂනාගාරයක මරා දමා සිටි භෞතික විද්‍යාඥයෙකුගේ සිරුරේ ඇඳ තිබූ අසාමාන්‍ය සංඛේතයක් සහිත පච්චයක් පිළිබඳව අධ්‍යනය කිරීමට හාවඩ් සරසවියේ සංකේත පිලිබඳ විශේෂඥ Robert Langdon කැදවෙයි.එකී පච්චය අධ්‍යනය කරන ඔහු එතෙක් මෙතෙක් ලොව බිහිව තිබී වියකී ගිය බලගතුම සහෝදරත්ව කණ්ඩායමක යලි පිබිදීමක් පිලිබඳව හෝඩුවාවක් ලබාගනියි.
ඉලුමිනාටි නම් වන එකී සමුහයේ පුනරාගමනය, තමන් පුරාතන යුගයේ සිටම බද්ධ වෛරයෙන් පෙලෙන වතිකානුව විනාශ කිරීමේ අවසන් මෙහෙයුම දියත් කිරීම පිණිස වෙයි.
මේ අතර ඉලුමිනාටි පණිවිඩ කරුවෙක් තමන් වතිකානු නගර මධ්‍යයේ කාල බෝම්බයක් සැගවූ බවට වතිකානු කතෝලික පල්ලියට දැනුම් දෙයි.
බෝම්බය සොයාගැනීමට ආධාර වීමට Robert Langdon රෝමය වෙත පිය නගයි.
වතිකානුව බේරාගනු වස් වැසී ගිය බිම් ගෙවල්,භයානක සොහොන්,අත් හැර දැමූ දෙව් මැදුරු හරහා වසර 400ක් පැරණි මං සලකුණු ඔස්සේ Langdon සහ පොලිසිය සමග වැඩ කරන ඉතාලි සුරූපීනියක සහ විද්‍යාඥවරියක වන Vittoria Vetra ඉලුමිනාටි තිප්පොළක් සොයා යයි.
කාල බෝම්බය නිෂ්ක්‍රිය කොට වතිකානුව බේරා ගැනීමට ඔවුන්ට හැකි වේවි ද ??? Goodreads user ratings 3.79(2014.08.12) ඇති ත්‍රාසය භීතිය කුතුහලයෙන් සපිරි මෙය ඔබ කියවිය යුතුම පොතකි...